A Consellería de Vivenda e Solo, que dirixe Teresa Táboas, concede un prazo dun mes para que a empresa propietaria das parcelas 1 e 2 do Polígono de Navia inicie a construción das 425 vivendas protexidas previstas neses terreos. En caso contrario, o departamento autonómico iniciará un proceso de reversión da titularidade das parcelas que serían adquiridas pola Consellería.

Trátase de dúas parcelas, unha de 4.726 metros cadrados cunha edificabilidade prevista para 278 vivendas, e a parcela 2 de 3.000 metros cadrados, cunha edificabilidade de 192 vivendas protexidas. A UTE adxudicataria destas parcelas é propietaria dos terreos desde hai 4 anos e ten licenza de obra desde agosto de 2005. Sen embargo a día de hoxe non iniciou as obras nin comunicou razón algunha que xustifique porque non se iniciasen as obras, de aí a decisión do departamento que dirixe Teresa Táboas, que onte se lle transmitiu aos responsables a promotora nunha reunión mantida co delegado provincial da Consellería de Vivenda e Solo, Eudosio Álvarez.

A Consellería de Vivenda e Solo púxose en contacto coa UTE para comunicarlle oficialmente que dispón do prazo dun mes para iniciar a obra, xa que doutra forma estaría incumprindo o principio de función social que motivou a adquisición e urbanización dos terreos con recursos públicos coa finalidade de que albergaran vivenda protexida.

A Asociación Veciñal de Navia organiza este ano por primeira vez un Campamento de Verán para os nenos/as da parroquia e que sexan socios/as. O campamento de verán se realizará segundo a demanda nos meses de xullo e/ou agosto. O horario sera de 9.00 a 14.00 horas coa posibilidade de deixar aos nenos ás 10.00 horas. As idades dos nenos para participar serán de entre 5 e 14 anos.

Segundo manifestou o concelleiro de Tráfico, Antonio Coello, o Concello de Vigo espera que a finais de ano estean en funcionamento tres radares fixos de control de velocidade nas Avenida de Samil, Avenida de Europa e nos túneles de Beiramar e da AP-9, na súa saída cara ao Porto.

Os tres radares, que serán instalados en nove cabinas, seranlle entregados ao Concello pola Xefatura Central de Tráfico, que achegará 385.000 euros dos seus orzamentos para a súa execución.

O Concello, segundo o convenio asinado o pasado 6 de abril coa Xefatura Central de Tráfico, realizará os investimentos necesarios para a execución de toda a obra civil (canalizacións, arquetas, illas, etc.), así como as acometidas eléctricas necesarias para alimentar os cinemómetros. Ademais, o Concello efectuará o abono dos consumos de enerxía á empresa subministradora, contratará o mantemento e conservación das instalacións e levará a cabo as revisións periódicas dos elementos que se deterioren polo uso continuo ou como consecuencia de accidentes.